Serat Kawalian 2 | Sajak Godi Suwarna

SERAT KAWALIAN 2

(Citraresmi)

Di dieu, di puseur nagri halimun, tepung deui

Jeung tutunggul nu teu weléh ngalanggengkeun lalakon

Getih salira. Saban wanci, hujan keris ngagulidag

Nyiksik dada nu ngatiga. Basa leuweung beuki lénglang

Létah cidra geuning terus ngabudahkeun areuy tua

Sapanjang walungan mangsa. Jungjunan, najan lanjung

Léngkah kalah ngarandakah palebah umpakan angin

Nu lebuna nyidem tatu. Gumelebug

Tina lukut kana kalbu

Gupay-gupay kakayon jeung hiuk waktu

Murudulkeun kalakay pucuk jamparing. Niruk panon

Jeung genggerong. Lir salira nu jumerit maratan abad

Jeung abad, aweuhan lalancip kawih mirig kalakay kacapi

Nu kasawang tingkalayang ngurugan jugang katineung

Kadaka nyampak nanahan basa ringkang ngaligincing

Rumanggieung néang asih tina petétan kapeurih

Nu lumengis dina reumis jeung hinisna

‘Na ruruhit ibun bajra 

Nyangsaya di Linggahiang. Bet kapireng surak duhung

Gumuruh meuncit papanting. Mangpirang pedang

Kasawang nyisit kukupu. Pakarang teu weléh gangas

Ngudag-ngudag juringkang ka patilasan. Jungjunan,

Layung hideung jadi umpalan kakeueung nu mindingan

Genclang asih sanggeus tumpur sakur ketak

Balas nyorang tegal tumbak. Kari peuting

Humarurung. Kari batu tingragamang

Mipit genclang getih bulan

 Astanagedé, 98