Godi Suwarna : Panineungan "Nyiar Lumar" Munggaran (1)

TI GEDONG KASENIAN JOG KA SITUS ASTANAGEDÈ

Tos "Nyiar Lumar" deui baè. Uhun, malem Minggu engkè, ping 19 November 2016. Emh, teu karaos ari waktos. Baris nyorang deui acara dua taunan nu dikawitan taun 1998, nu dugi ka kiwari teu welèh diarep-arep ku urang Sunda nan berbudaya. Malah, lain urang Sunda wungkul nu sok sarumping tèh, dalah urang nagara jeung benua sabrang ogè sok aya nu ngaluuhan. Raresepeun. Cang kungsi aya nu komplèn.

Teu ngahaja-haja rèk nyieun acara "Nyiar Lumar" tèh. Mimitina mah tina acara kèmping barudak Tèater Jagat SMA Kawali. Sok dibagi per grup. Saban grup kudu nampilkeun kasenian, naon baè. Digelar peuting-peuting bari api unggun, nyeungeut damar sèwu. Dipungkas ku ngaliwet. Tuluy ngalobrol daria. Di antarana, barudak tèh ngalalamun hayang boga gedong kasenian.

Ari uing teu pati kabita ku gedong kasenian tèh. Da geuning gedong-gedong kasenian di kota-kota laleutik mah teu kaurus ieuh. Programna teu puguh da teu dimodalan ku pemkabna. Dina ayana ogè sapèrèlèk pisan. Teu cukup jangeun muruhan tukang sasapu-sasapu acan. Puguh wè, gedong-gedong kasenian tèh tèreh pisan nararik kolotna.

Atuh dina bogana gedong kasenian, mun urang lembur barang jieun kasenian, can karuhan urang dayeuh nu aranggang kalerseun rurumpaheun sarumping ngalalajoan. Jangeun urang lembur mah asa mending nyieun acara nan unik, nu moal aya duana di dunya.

"Urang tèh boga situs nu kawilang penting keur urang Sunda mah. Astanagedè. Matak naon mun cuang nyieun acara di Astanagedè? Siga kèmping kieu wè, ngan skalana digedèan! " cekèng. Dang Q, Kokolot Tèatèr Jagat harita, jeung barudakna, sapuk rèk ngagelar kasenian di situs Astanagedè, patilasan Gusti Putri Citraresmi kalih Eyang Prabu Niskala Wastukancana.

Geura kè cuang pedar, kumaha lalakon Dang Q spk, basa ngagarap "Nyiar Lumar" nu munggaran, taun 1998, sapoè samèmèh Orde Baru runtag. Seru, keueung, ahèng. Pokona, ruaaar biasaaa!

Antos baè pedaran salajengna! Okèh?